Albisteak
Nafarroako Filmategiak Gazteentzako Zinema Tailerraren edizio berri bat antolatu du, aurten ekainaren 24tik 28ra Iruñeko Planetarioan.
Ekimen honek nerabeen artean zinemarekiko interesa sustatzea du helburu. Planetarioa benetako zinema-plato bihurtuko da lau egunez, eta 12 eta 16 urte bitarteko gazteei hezkuntza-esperientzia osoa eskainiko zaie Zazpigarren Artearen munduan. Julio Mazarico zinemagile nafar ezagunaren zuzendaritzapean, film labur baten sorkuntzaren etapa guztiak esploratu ahal izango dituzte parte-hartzaileek, gidoiaren sorkuntzatik hasi eta azken muntaketaraino, hizkuntza zinematografikoaren azterketan eta ulermenean oinarrituta.
Sormen-esperientzia teknologia digitalera egokituko da, eta, horri esker, ikasleek tresna berriekin esperimentatu ahal izango dute beren proiektuak sortzen, garatzen, gauzatzen eta editatzen. Planetarioko espazioen aldakortasunari esker, parte-hartzaileek barruko zein kanpoko eremuak erabili ahal izango dituzte beren sorkuntzei bizia emateko, tokia benetako filmazio-set bihurtuz.
Lantegi honetan sortutako film laburra Filmategian proiektatuko da, zinemagile gazteei euren lana pantaila handian ikusteko aukera eskainiz. Izena emateko epea zabalik dago Planetarioaren webgunean, 100 €-ko matrikularekin (75 €kasu berezietan). Ekimen hau esperientzia aberasgarria eta zirraragarria izango da parte-hartzaile guztientzat, Nafarroako Filmategiak eskualdeko gazteen artean zinemaren hezkuntza eta sustapenarekin duen konpromisoa sendotuz.
NAFARROAKO LIBURUTEGIA ETA FILMOTEKA ERAIKINA
Artxibo Filmografikoa