Nafarroako Filmotekak François Truffaut frantses zinemagilearen film adierazgarrienetako batzuk emanen ditu, maiatzean eta ekainean eginen den zinema zikloaren barruan. François Truffaut. Zinema-desioa, izan ere, maiatzaren 6an hasiko da, guztira zortzi film emanen dira, eta lehen saioan Los cuatrocientos golpes egonen da ikusgai, hau da, zuzendariaren lehen film luzea. Saio guztiak ostiraletan eskainiko dira, 20:00etatik aurrera, jatorrizko bertsioan, hau da, frantsesez, eta azpitituluak gaztelaniaz jarrita. Emanaldiez gain, Carlos Losilla zinema-kritikariak Truffauten zinemari buruzko mintzaldi bat eskainiko du maiatzaren 12an.

Nafarroako Filmotekak INAAC Panorama zikloari berrelduko dio maiatzean; Nafarroarekin zerikusia duten pelikula egin berriei eskainitako zinema-zikloa da, Punto de Vista 2011 Zinema Dokumentalaren jaialdian abiarazitakoa. Oraingo honetan, zikloak hiru lan emanen ditu: maiatzaren 19an, ostegunean, 778- La Chanson de Roland film luzearen gaztelaniazko bertsioa eta euskarazko bertsioa; ekainaren 15ean, asteazkenean, La jota navarra. Pasión por un canto izenburuko dokumentala, eta, ekainaren 30ean, ostegunean, Jesús Monzón, el líder olvidado por la historia pelikula gaztelaniaz eta euskaraz.