Nafarroako Filmotekak bat eginen du bihar, asteartean (urriaren 18an) Home Movie Day egunarekin; hartara, Nafarroako film-ondareko ale batzuk emanen ditu, denak azken hilabeteotan berreskuratutakoak. Zinemagile afizionatuek 1940tik 1980ra grabatutako zatiak dira, super 8 mm-ko, 8 mm-ko eta 16 mm-ko kamerak erabilita. Familia giroko irudiez gainera, film aunitzek balio handia dute etnografiari, folkloreari, dokumentalari, historiari eta herri-izaerari begira. Horrela, beste irudi batzuen artean, nabarmentzekoak dira Iruñeko Ziudadelari buruz airetik hartutako irudiak, armadak harresi-barrutiaren barruan eta inguruan zeuzkan eraikinak eraitsi aurretik eta ondotik; hasiera-hasierako aeromodelismoari buruzko irudi batzuk, Larrabiden XX. mendeko 40ko hamarkadan hartutakoak; Iruñeko  3 Reyes Hotelean egindako modelo-desfile bat, eta 1970ean Uxuera egindako erromeria bat.

Sarrera doan izanen da eta iluntzeko 20:00etan hasiko da. Dena den, aldez aurretik, ikusleek leihatilan gonbidapena jaso beharko dute.

Bihar emanen diren pelikulak jaso egin dira Nafarroako Filmotekak joan den ekainean egindako deialdiaren ondotik. Filmotekak, zehazki, herritarrak animatu egin zituen S-8 mm, 8mm, 9,5 mm, 16 mm eta 35 mm-ko filmak ekartzera. Lau hilabete honetan, Filmotekako artxiboetara 13.500 metro pelikula ekarri dira (20 bat proiekzio-ordu), 195 bobinetan banatuta, 8 mm, s-8 mm eta 16 mm-koak, eta 10 lagunenak dira.

Deialdiak zabalik dirau, eta film-materiala duen zinemagile amateur orok dauka era horretako irudiak Filmotekara ekartzeko aukera, zinta guztiak ongi zaintzeko. Era berean, filmen egiletza eta pelikulen gaineko eskubideak bermatuko dira.

 

Home Movie Day

Orain dela urte batzuetatik hona, mundu zabaleko hainbat herrialdek Home Movie Day eguna egiten dute. Afizionatuek grabatutako film-dokumentuak edo “etxeko pelikulak” esaten zaienak jendaurrean ematen dira.

Film-artxiboetan adituak diren amerikar espezialista zenbaitek 2002an abiarazitako ekimena da, herritarrak film-memoria pribatuak gordetzeak duen garrantziaz sentsibilizatzeko.  Orduez geroztik, ekimena zabaldu egin da eta, orain, egun bat eskaintzen zaio; aurtengoan, urriaren 15etik 20ra eginen da, 14 herrialdetan; Europako 8tan, besteak beste.