Saio bereziak

Hilabete honetan lau emanaldi berezi ekarriko ditugu gure aretora, eskaintza aparta osatuz, zikloz kanpokoa delako eta, batez ere, proposamen guztien kalitateagatik.

Lehenengoa Ateneo Navarrorekin hilero egiten den lankidetza handitzea da. Zuzendariak hainbat areto eta filmotekan egiten ari diren birari esker, La noche está marchándose ya proposatzen dugu, Ezequiel Salinas eta Ramiro Sonzini argentinar zinemagileen film luzea. Filma ondoen deskribatzen duten testuetako bat Carlos Losillak Caimán Cuadernos de Cine aldizkarirako idatzitakoa da:

 "Egia da La noche está marchándose ya, Ezequiel Salinas eta Ramiro Sonziniren film argentinarra – azken hau La vida útil zinema-aldizkariaren koeditorea: oraindik ez baduzue irakurri, egin korrika ale baten bila – presak markatutako filma da, baina zer pelikula handi ez da hala?"

Filmotekak saio bikoitza izango du, urriaren 8an eta 9an, Iruñeko Topaketen programazioarekin bat eginez. Hilaren 8an, José Luis Guerínek Historias del buen valle, 2025 aurkeztuko du, bere azken filma, 2025eko Donostiako Zinemaldian saritua eta kritikak goraipatua. Dokumental fresko eta arriskutsua da, eta poesiaz eta gizatasunez erretratatzen du bazterretako bizitza.

Hilaren 9an, Víctor Erice zinemagileak bere bost film laburren bilduma bat aurkeztuko digu, ikuspegi guztiz pertsonaletik eginak, 2002tik 2018ra, ikuspegi aske batekin, artearekin konprometituta eta ohiko edozein planteamendu zinematografikotik kanpo. Luxu handia izango da ikuslearentzat eta Espainiako Zinemaren Historiako zinegile garrantzitsuenetako baten jarraitzaileentzat.

Azkenik, Filmotekak bat egiten du Proclade Yanapay eta SED GGKEek sustatutako Klimaren aldeko Bigarren Astearekin, Natxo Leuza nafar dokumentalista ezagunaren Black Water, 2025 dokumentalaren proiekzioarekin. Black Water filmean Bangladesheko egoera irudikatzen da. Montzoi garaian, ibaiak hazi egiten dira, ibilguz aldatzen dira eta komunitate osoak lekualdatzen dituzte. Filmak ibilbide luzea izan du nazioartean, eta hainbat sari jaso ditu. Proiekzioaren ondoren elkarrizketa bat izango da.