El general de la Rovere

Aliatuak, 1943an, Italia hegoaldera heldu dira, baina iparraldea faxisten mende dago, alemaniar okupazioa dela eta. Genovan, naziek Bertone atxilotu dute, antzerkirako dohain handiak dituen iruzurgile bat, eta faxismoaren kontrako militar baten itxurak egitera behartu dute; militar hori della Rovere jenerala da. Bertoneren zeregina Erresistentziako buruak identifikatzea besterik ez da, baina papera oso serio hartuko du.

 

Pelikula Indro Montanelli kazetariaren kontakizun batean dago oinarritua. Montanellik Giovani Bertone, della Rovere jenerala, ezagutu zuen Milango espetxe batean; biak naziek atxikita zeuden. Handik ateratakoan, Montanellik Bertoneren istorioa idatzi zuen. Alemaniak Italia okupatu aurreko hilabeteetan gertatutakoa kontatu zuen; elkarrekin bizitzea zaila zen, alemanen alde edo aurka agertzea hil ala biziko kontua baitzen. Dilema moral horiek maisuki daude azalduta bai eleberrian bai Rosselliniren pelikulan; gainera, De Sicak antzezpen zoragarria egin zuen. 

 

Pelikulak urrezko lehoia jaso zuen Venezian eta Oscar sarietarako hautagai izan zen; gainera, New Yorkeko kritikariek atzerriko ekoizpen onenaren saria eman zioten.