Brief Encounter (Harreman laburra)

David Lean (1908-1991) britainiarraren lana zinemak eman duen amodiozko istorio ezin hobe eta hunkigarrienetako bat da. Noël Coward-en antzezlan batean oinarrituta, argumentua hutsala dela esan daiteke: tarteko adineko gizon batek eta emakume batek (Trevor Howard eta Celia Johnson) halabeharrez tren geltoki batean elkar ezagutu dute eta amodiozko harreman laburra, itsua (erabat platonikoa) hasi dute. Horrek monotonia grisean murgilduta dituzten bizitzei bultzada eta itxaropena emanen die. Emakumeak barne-bakarrizketan kontatutako harreman bakun hori da Coward-ek baliatu zuen euskarria urte haietako erdi-mailako britainiarren analisi sakona egiteko, bereziki gizarte-ohitura zurrunek emakumeei ezartzen zieten jokabidearena, Coward-i ospea eman zioten komedia finetatik aldenduta.

Lean-ek gidoi hori iruditan jarri zuen inspirazio handiz eta zuhurtasun orekatuaz, samurkerian ez erortzearren. Eguneroko gertaerekin bat, zuzendariari geroago ospea emango zion ikusgarritasunaren ordez, intimitatea eta xehetasuna aurki ditzakegu (agurtzeko momentuan gizonak emakumearen sorbaldaren gainean jarritako eskua), Rachmaninoff-en pianorako 2. kontzertu ederraz lagunduta. Orobat, dekoratuak Ingalaterra gerratik atera berri zen berunezko urte haietako isla dira. Bertan leku goibel eta egunerokoak aurki ditzakegu, Brief encounter filma gerraondoko britainiar zineman ere eman zen neorrealismoaren adibide bikain bihurtzen dutenak.

Filmari 1946.eko Cannes-eko Jaialdian Kritikaren Nazioarteko Saria eman zioten eta Oscar sarietarako hiru hautagaitza izan zituen: zuzendaritza, emakume-aktore nagusia eta jatorrizko gidoia. 1975. urtean eta izenburu berarekin, telebistarako istorioaren “remake” bat egin zuten (ahaztekoa), Richard Burton-ek eta Sofia Loren-ek parte hartu zutelarik. Ulu Grosbard-en Falling in love (1984) eta Clint Eastwood-en The bridges of Madison County filmek ere asko zor diote film honi.